Путин Ғарб унинг шартларини қабул қилмагунча урушни давом эттиради. Бу ҳақда Reuters хабар берди.
"Россия президенти Владимир Путин АҚШ етакчиси Дональд Трампнинг таҳдидларига қарамай, Ғарб унинг тинчлик бўйича шартларига рози бўлмагунча урушни давом эттириш ниятида", дея хабар бермоқда агентлик Кремлга яқин манбаларига таяниб.
Уларнинг айтишича, Россия қўшинлари олдинга силжиган сари Путиннинг Украинага нисбатан ҳудудий талаблари ҳам ортиши мумкин.
Манбаларнинг сўзларига кўра, Путин Россия иқтисодиёти ва қуролли кучларини Ғарбнинг исталган қўшимча чораларига қарши тура олади, деб ҳисоблайди. Путин, шунингдек, АҚШ томонидан Россия нефтини харид қилувчиларга нисбатан жорий қилиниши мумкин бўлган бож ставкалари каби иқтисодий қийинчиликларга Россия дош бера олишига ишонади.
"Путиннинг фикрича, ҳеч ким, жумладан америкаликлар ҳам, у билан Украина бўйича тинчлик шартларини жиддий муҳокама қилмаган. Шунинг учун у ўз мақсадига эришмагунча урушни давом эттиради", — деди Reuters манбаларидан бири.
Унинг айтишича, Путин Трамп билан муносабатларни қадрлайди, бироқ Россия манфаатларини ҳаммасидан устун деб ҳисоблайди.
