Атом энергияси бўйича халқаро агентлик (АЭХА) бошқарувчилар кенгаши Исроил ва АҚШнинг Эрон ядровий майдонларига қилган ҳужумларидан сўнг фавқулодда йиғилиш ўтказди. Йиғилишда агентлик раҳбари Рафаэл Мариано Гросси дипломатия йўли ҳали ҳам очиқ экани, бироқ акси юз берса дунё тасаввур қилиб бўлмайдиган даражада ҳалокатга учраши хавфи борлигини айтди.
Гроссининг хабар беришича, 13 июн куни у Эрон ташқи ишлар вазири Аббос Арақчидан мактуб олган, унда у ядровий асбоб-ускуналар ва материалларни ҳимоя қилиш бўйича "махсус чора-тадбирлар кўрилгани" ҳақида хабар берган. Бунга жавобан АЭХА Теҳронга ядровий моддаларнинг ҳар қандай ҳаракати агентлик билан келишувлар доирасида декларация қилиниши кераклигини эслатди.
Гроссининг сўзларига кўра, жанговар ҳаракатларни тўхтатиш АЭХА инспекторларини ядровий мажмуаларга киритиш учун зарур. Унинг таъкидлашича, Теҳрон халқаро мажбуриятларга риоя қилган ҳолда ҳар қандай ҳимоя чораларини кўриш ҳуқуқига эга.
Фордо иншоотининг ерости қисмига зарбаларни изоҳлар экан, Гросси агентлик вайронагарчилик кўлами ҳақида тўлиқ маълумотга эга эмаслигини таъкидлади. Бироқ, ишлатиладиган портловчи қурилмалар ва центрифугаларнинг тебранишларга сезгирлиги ҳисобга олинса, жиддий зарар кутилиши мумкин.
Шу билан бирга, Эрон томони АЭХАга ҳар учала объектда ҳам радиация фонининг ўсиши қайд этилмагани ҳақида маълум қилди. Агентлик маълумотларига кўра, бошқа объектларда ҳали ўзгаришлар кузатилмаган.
Гросси Эрон ҳукуматига АЭХА инспекторлари хавфсизлигини таъминлаш чоралари учун миннатдорчилик билдириб, вазият кескинлашган бир пайтда ҳамкорликни давом эттириш муҳимлигини таъкидлади.
