Исроил қирувчи самолётлари 15 июнга ўтар кечаси Теҳрондаги Шаҳрон нефть сақлаш базасига ҳамда Эрон мудофаа вазирлиги биносига авиазарбалар йўллади, деб хабар бермоқда Tasnim агентлиги.
Ҳужум нишони мудофаа вазирлиги штаб-квартираси бўлган. Агентлик мухбирининг маълум қилишича, вазирликнинг офис биноларидан бирига бироз зарар етган.
Бундан ташқари, Исроил ҳужуми оқибатида Теҳроннинг асосий ёқилғи омбори – Шаҳрон нефть омборида ёнғин содир бўлди, деб ёзади The New York Times. Гувоҳнинг нашрга айтишича, портлаш зилзилани эслатган.
Tasnim нашри ёзишича, нефть омборига ҳужум оқибатида иккита ёқилғи сақлаш резервуари ёниб кетган. Эрон нефть вазирлиги маълумотларига кўра, қутқарувчилар ёнғинни назоратга олган, фуқаролар учун хавф йўқ.
Шунингдек, Теҳрон нефтни қайта ишлаш заводида ҳам ёнғин чиққани ҳақида хабарлар пайдо бўлган, аммо Эрон ҳукумати буни рад этди.
