Қонунийликни таъминлаш ва пойтахтнинг меъморий яхлитлигини сақлаш мақсадида махсус хизматлар тегишли рухсат ҳужжатлари бўлмаган реклама конструкцияларини олиб ташламоқда. Бу ҳақида Тошкент шаҳар ҳокимлиги маълумот берди.
Билдирилишича, шаҳар инфратузилмаси таҳлили шуни кўрсатадики, рухсатсиз ўрнатилган реклама шитлари, баннерлар ва пешлавҳалар ободонлаштириш қоидаларини бузиб, пойтахт кўчалари ва туманларининг кўринишини бузмоқда.
Шунингдек, пиёдалар йўлаклари ва йўл четларини тўсиб қўйиб, айниқса кам ҳаракатланувчи фуқароларнинг юришини қийинлаштирмоқда ҳамда йўл ҳаракати хавфсизлигига хавф туғдириб, йўл белгиларини кўришга халақит бермоқда.
Бундан ташқари, муҳандислик тармоқларига, жумладан суғориш каналларига зарар етказиб, ёмғирли мавсумда ҳудудларнинг сув босишига сабаб бўлмоқда.
Юқоридагиларни инобатга олиб, Тошкент шаҳар ҳокимлиги бизнес эгалари, якка тартибдаги тадбиркорлар ҳамда ижарачиларга ташқи реклама ва ахборот конструкцияларини жойлаштириш юзасидан мурожаат йўллади.
"Реклама объектларингиз — баннерлар, кўрсаткичлар, конструкцияларни жойлаштириш учун расмий рухсатнома борлигига ишонч ҳосил қилинг.
Жойлаштирилган рекламалар техник талабларга жавоб бериши ва пиёдалар ҳамда транспорт воситаларининг ҳаракатига тўсқинлик қилмаслигига ишонч ҳосил қилинг.
Қоидабузарлик ҳолатлари аниқланса, жарималар ва қўшимча харажатлардан қочиш учун объектларни ўзингиз бартараф этинг.
Эслатиб ўтамиз: ташқи рекламани жойлаштириш учун ягона қонуний асос Тошкент шаҳри ваколатли органлари томонидан берилган ҳужжатлардир", дейилади ҳокимлик мурожаатида.
Маълумот учун, маслаҳат олиш ёки ариза топшириш учун давлат хизматларининг онлайн сервисларидан фойдаланишингиз ёки қуйидаги 71 210 0433, 71 210 0266 рақамларга мурожаат қилишингиз мумкин бўлади.
