Mirziyoyev sog‘liqni saqlashda xususiy sektorni kengaytirish bo‘yicha yangi takliflar bilan tanishdi

Shavkat Mirziyoyev sog‘liqni saqlash tizimini yanada rivojlantirishga oid taqdimot bilan tanishdi. Unda aholiga zamonaviy tibbiy xizmat ko‘rsatish, boshqaruv samaradorligini oshirish va xususiy sektor ishtirokini kengaytirish masalalari muhokama qilindi. Ma’lum qilinishicha, so‘nggi yillarda xususiy klinikalar soni sezilarli oshgan: 2016-yilda 3,2 mingta bo‘lgan muassasalar 2026-yilga kelib 8,7 mingtaga yetishi kutilmoqda. Shu bilan birga, sohada nazorat mexanizmlari yetarli emasligi, litsenziyalash talablari zamonga mos emasligi kabi muammolar ham qayd etildi. Taqdimotda tibbiy faoliyatni litsenziyalash tartibini kuchaytirish, nazoratni elektron tizim orqali amalga oshirish, shuningdek, xususiy klinikalarga budjet mablag‘lari hisobidan xizmat ko‘rsatish imkonini berish taklif qilindi. Akkreditatsiyadan o‘tgan xususiy muassasalarga transplantatsiya bilan shug‘ullanishga ruxsat berish ham rejalashtirilmoqda. Shuningdek, 2030-yilga qadar barcha davlat tibbiyot muassasalarini bosqichma-bosqich majburiy litsenziyalash, olis hududlarda klinikalar tashkil etish uchun imtiyozli kreditlar ajratish va xorijiy mutaxassislar uchun soliq imtiyozlari joriy etish ko‘zda tutilgan. Sohaga investitsiyalarni jalb qilish maqsadida Tibbiyot va farmatsevtika tarmog‘ini rivojlantirish agentligini tashkil etish, shuningdek, “Health Invest” kompaniyasini yo‘lga qo‘yish taklif etildi. Davlat rahbari taqdim etilgan takliflarni ma’qullab, mas’ullarga ularni amalga oshirish bo‘yicha topshiriqlar berdi.