Prezident Shavkat Mirziyoyev jamoat xavfsizligini ta’minlash tizimini yanada takomillashtirish bo‘yicha takliflar taqdimoti bilan tanishdi. Unda Ichki ishlar vazirligidagi Jamoat xavfsizligi departamenti faoliyatini zamonaviy boshqaruv va raqamli nazorat asosida qayta tashkil etish masalalari muhokama qilindi.
Takliflarga ko‘ra, profilaktika inspektorlari ortiqcha vazifalardan ozod qilinib, ularning asosiy e’tibori mahallalarda huquqbuzarliklarning oldini olishga qaratiladi. “Mening inspektorim” elektron tizimi joriy etilib, sud-tibbiy muassasalar bilan ma’lumot almashuvi raqamlashtiriladi hamda inspektorlar online o‘qitiladi.
Shuningdek, inspektorlarga ayrim huquqbuzarliklar bo‘yicha mustaqil qaror qabul qilish vakolatini berish, ma’muriy ogohlantirish tizimini yo‘lga qo‘yish va profilaktika bo‘yicha yagona axborot bazasini yaratish rejalashtirilmoqda. Prezident mutasaddilarga jamoat xavfsizligini mustahkamlash va fuqarolar murojaatlariga tezkor javob berish bo‘yicha aniq echimlar ishlab chiqish topshirig‘ini berdi.
