Президент Шавкат Мирзиёев жамоат хавфсизлигини таъминлаш тизимини янада такомиллаштириш бўйича таклифлар тақдимоти билан танишди. Унда Ички ишлар вазирлигидаги Жамоат хавфсизлиги департаменти фаолиятини замонавий бошқарув ва рақамли назорат асосида қайта ташкил этиш масалалари муҳокама қилинди.
Таклифларга кўра, профилактика инспекторлари ортиқча вазифалардан озод қилиниб, уларнинг асосий эътибори маҳаллаларда ҳуқуқбузарликларнинг олдини олишга қаратилади. “Менинг инспекторим” электрон тизими жорий этилиб, суд-тиббий муассасалар билан маълумот алмашуви рақамлаштирилади ҳамда инспекторлар онлайн ўқитилади.
Шунингдек, инспекторларга айрим ҳуқуқбузарликлар бўйича мустақил қарор қабул қилиш ваколатини бериш, маъмурий огоҳлантириш тизимини йўлга қўйиш ва профилактика бўйича ягона ахборот базасини яратиш режалаштирилмоқда. Президент мутасаддиларга жамоат хавфсизлигини мустаҳкамлаш ва фуқаролар мурожаатларига тезкор жавоб бериш бўйича аниқ ечимлар ишлаб чиқиш топшириғини берди.
