Mutaxassislarning tushuntirishicha, kislotali yog‘inlar atmosferada oltingugurt oksidlari (SO₂) va azot oksidlari (NO₂) uzoq vaqt to‘planib, bulutlarda suv bug‘i bilan kimyoaviy reaktsiyaga kirishishi natijasida hosil bo‘ladi. Bunday jarayonlar odatda yirik sanoat hududlari va chiqindi manbalari yaqinida kuzatiladi.
Havo massalari uzoq masofaga ko‘chayotganda esa ifloslantiruvchi moddalar kontsentratsiyasi atmosfera jarayonlari — turbulentlik, vertikal aralashish hamda quruq va nam cho‘kish ta’sirida keskin kamayadi. Shu sababli manbadan minglab kilometr uzoqlikda xavfli darajadagi kislotali yog‘inlar shakllanishi deyarli mumkin emas.
Shuningdek, yog‘inlarning hosil bo‘lishi mahalliy bulut hosil bo‘lish jarayonlari bilan bog‘liq bo‘lib, yomg‘ir asosan hudud ustidagi atmosferada mavjud suv bug‘i va aerozollar hisobiga shakllanadi.
Meteorologik kuzatuvlar hamda atmosfera havosini sifat monitoringi natijalariga ko‘ra, kislotali bulutlarning O‘zbekiston yoki qo‘shni davlatlar hududiga ko‘chib kelishi havfi kuzatilmayapti.
Mutasaddilar OAV va ijtimoiy tarmoqlardan tasdiqlanmagan ma’lumotlarni tarqatmamaslikni, faqat rasmiy manbalarga tayanishni so‘radi. Shuningdek, yolg‘on yoki tekshirilmagan axborotni tarqatish qonunchilikda belgilangan tartibda javobgarlikka sabab bo‘lishi mumkinligi eslatildi.
