Hozirda 60 dan ortiq bola statsionar davolanmoqda.
Farg'ona shahrida 20 fevral kuni 2-, 58- va 61-sonli davlat maktabgacha ta'lim tashkilotlari tarbiyalanuvchilarida isitma, qorin og'rig'i, ko'ngil aynishi va ich ketishi kabi alomatlar kuzatilgan. 21 fevral soat 19:00 dan boshlab bolalar Farg'ona viloyati yuqumli kasalliklar shifoxonasiga murojaat qilgan.
Shifokorlar tomonidan ularga "O'tkir diareya kasalligi, alimentar etiologiyali" tashxisi qo'yilib, diareya bo'limiga yotqizilgan. Hozirda 62 nafar bola statsionar davolanmoqda, ularning holati qoniqarli deb baholanmoqda.
Ota-onalarning aytishicha, taomlar Garden Catering Trade MChJ tomonidan yetkazib berilgan. 20 fevral kungi menyuda go'shtli taom — "tipratikan" tifteli ham bo'lgan. Ayrim murojaatchilar bolalar go'sht mahsulotidan zaharlangan bo'lishi mumkinligini taxmin qilmogda.
Viloyat hokimining 2024 yil 25 iyuldagi qaroriga muvofiq, avval Quvasoy shahrida sinov tariqasida joriy etilgan katering tizimi keyinchalik Farg'ona shahridagi davlat bog'chalariga ham tatbiq etilgan. Keyinchalik mas'ul idoralar tomonidan mazkur korxona faoliyatida sanitariya va me'yoriy talablarga rioya qilinmaganligi aniqlandi.
Farg'ona viloyat sog'liqni saqlash boshqarmasi ma'lum qilishicha, hozirda sanitariya-epidemiologik mutaxassislar bog'chalar va ovqat yetkazib beruvchi korxonada tekshiruv o'tkazib, laboratoriya tahllilarini olib bormoqda.
Eslatib o'tamiz, 2025 yil sentyabr oyida Toshkent viloyatidagi bog'chalarda ham ommaiviy zaharlanish holati kuzatilgan, oradan bir oy o'tib Forish tumanidagi davlat bog'chalarida ham shunga o'xshash voqea sodir bo'lgan edi.
