Vazirlar Mahkamasining 19 fevraldagi qaroriga muvofiq, ipoteka krediti uchun boshlang‘ich badalning 25 foizi davlat byudjeti hisobidan qoplab beriladi. Subsidiya olish uchun pedagog Davlat xizmatlari markazlari yoki Yagona interaktiv davlat xizmatlari portali orqali ariza topshiradi.
Ariza elektron tarzda ko‘rib chiqiladi va talabgor haqidagi ma’lumotlar — fuqaroligi, ish staji, oliy malaka toifasi, daromadlari hamda kredit tarixi tegishli vazirlik va idoralarning axborot tizimlari orqali avtomatik ravishda tekshiriladi. Qo‘shimcha hujjat talab qilishga yo‘l qo‘yilmaydi.
Ijtimoiy mezonlarga muvofiq deb topilgan talabgorga subsidiya ajratish yoki rad etish to‘g‘risida elektron xabarnoma yuboriladi. Shundan so‘ng pedagog ishtirok etuvchi tijorat bankini tanlab, uy-joyni birlamchi bozordan ipoteka krediti asosida sotib oladi. Bank kredit ajratish masalasini belgilangan tartibda ko‘rib chiqadi va notarial shartnoma rasmiylashtiriladi.
Qarorga ko‘ra, subsidiya bir oilaga (er yoki xotindan biriga) faqat bir marta beriladi hamda faqat birlamchi uy-joy bozorida amal qiladi. 2026 yilda ushbu maqsadlar uchun davlat byudjetidan 200 milliard so‘mgacha mablag‘ yo‘naltirilishi rejalashtirilgan. Subsidiya ajratish jarayoni maxsus elektron platformalar orqali shaffof va avtomatlashtirilgan tartibda amalga oshiriladi.
