Bugun, 19 fevral kuni Buyuk Britaniya politsiyasi Shahzoda Endryuni Jeffrey Epstein bilan bog'liq ish doirasida hibsga oldi. BBC ma'lumotiga ko'ra, Angliya sharqidagi Wood Farm hududiga bir nechta politsiya ekipaji va fuqarolik kiyimidagi zobitlar kelgan.
Xabar qilinishicha, Qirol Charlz IIIning ukasi davlat lavozimida bo'lgan vaqtda ehtimoliy noqonuniy harakatlarda ishtirok etganlikda gumon qilinmoqda. AQSh tomonidan e'lon qilingan hujjatlarda shahzoda Endryu Epsteinga maxfiy hukumat ma'lumotlarini bergan bo'lishi mumkinligi haqida da'volar keltirilgan.
Qirolicha Yelizaveta IIning ikkinchi o'g'li bo'lgan shahzoda Endryu bu ayblovlarni avval ham rad etgan va Epstein bilan do'st bo'lganidan afsusda ekanini bildirgan edi. Hozircha u so'nggi voqealar yuzasidan rasmiy bayonot bermagan.
