Xalqaro futbol federatsiyasi (FIFA) Rossiyaga nisbatan joriy etilgan sanksiyalarni bekor qilish masalasini yaqin kelajakda muhokama qilish yoki ovozga qo‘yishni rejalashtirmayapti. Bu haqda “The Times” nashri manbalariga tayanilgan holda xabar berdi.
Manbalarga ko‘ra, FIFA rahbariyati siyosiy va sport sharoitlari o‘zgarmaganini inobatga olib, bu masalani kun tartibiga olib chiqishni maqsadga muvofiq deb hisoblamayapti. Shu bois Rossiyaga nisbatan cheklovlarni qayta ko‘rib chiqish bo‘yicha rasmiy tashabbuslar mavjud emas.
Avvalroq FIFA prezidenti Janni Infantino Rossiya klublarini evrokuboklarga qaytarish imkoniyati yetgani haqidagi bayonoti bilan jamoatchilikda katta rezonans uyg‘otgan edi.
Ma’lumot uchun, Rossiya terma jamoalari va klublari 2022 yil 28 fevraldan beri barcha xalqaro musobaqalardan chetlatilgan. Qaror Ukrainadagi urush fonida qabul qilingan va muddatsiz hisoblanadi.
UEFA doirasida ham bu masala bir necha bor ko‘tarilgan bo‘lsa-da, yagona pozitsiya shakllanmagan. Mutaxassislar fikricha, geosiyosiy omillar sabab Rossiyaning xalqaro futbolga to‘liq qaytishi yaqin vaqtda ehtimoli past stsenariy sifatida baholanmoqda.
