29 fevral kuni Anqaraga rasmiy tashrif doirasida O‘zbekiston va Turkiya prezidentlari Hatay viloyatining Arsuz tumanida qurilgan “O‘zbekiston” turarjoy majmuasini ochib berdi, deya xabar qildi Prezident matbuot xizmati.
Ma’lum qilinishicha, zilziladan jabr ko‘rgan aholi uchun mo‘ljallangan ushbu majmua 24 ta ko‘p qavatli uy va 300 dan ortiq to‘liq jihozlangan xonadondan iborat. Loyiha barcha zarur infratuzilmani o‘z ichiga olgan.
Marosimda so‘zga chiqqan Shavkat Mirziyoyev O‘zbekiston Turkiyani og‘ir sinovli kunlarda yolg‘iz qoldirmaganini ta’kidlab, qutqaruv va tibbiy yordam jarayonlarida faol ishtirok etilganini qayd etdi.
Rajab Toyib Erdo‘g‘an esa mazkur majmua o‘zbek va turk xalqlari o‘rtasidagi do‘stlik va birodarlikning yorqin ramzi ekanini ta’kidladi. Davlat rahbarlari yangi uylarning kalitlarini egalariga tantanali ravishda topshirdi.
