Bugun, 26 yanvar kuni O‘zbekiston Respublikasi Prezidenti, Milliy Olimpiya qo‘mitasi raisi Shavkat Mirziyoyev Osiyo Olimpiya kengashining 46-Bosh Assambleyasida ishtirok etdi hamda Osiyo Olimpiya kengashi prezidenti etib saylangan Shayx Javon bin Hamad Ol Sonyiga Milliy Olimpiya qo‘mitasining "Shon-sharaf" ordenini topshirdi.
Osiyo Olimpiya kengashi 1982 yilda tashkil etilgan bo‘lib, Osiyo qit’asida olimpiya harakatini muvofiqlashtiradi. Hozirda tashkilotga 45 ta mamlakatning milliy olimpiya qo‘mitalari a’zo hisoblanadi. Mazkur Bosh Assambleya doirasida Osiyo olimpiya harakatining asosiy yo‘nalishlari belgilab olindi hamda kengash prezidentligi lavozimiga Qatar Olimpiya qo‘mitasi prezidenti Shayx Javon bin Hamad Ol Sonyi saylandi.
Tadbirda Xalqaro Olimpiya qo‘mitasi, Osiyo Olimpiya kengashi, WADA, xalqaro sport federatsiyalari rahbarlari hamda boshqa nufuzli sport tashkilotlari vakillari ishtirok etdi.
