8 aprel kuni internetda Navoiy shahridagi xususiy maktabgacha ta’lim muassasasida tarbiyachi bolalarga nisbatan zo‘ravonlik qilgani aks etgan video tarqaldi. Holat yuzasidan viloyat Ichki ishlar boshqarmasi ma’lumot berdi.
Aniqlanishicha, voqea 7 aprel kuni Navoiy shahrining “Yangiariq” MFY hududida joylashgan, fuqaro S.S. rahbarligidagi xususiy bog‘chada sodir bo‘lgan. 2003 yilda tug‘ilgan tarbiyachi E.N. o‘z qaramoqidagi guruh bolalarini “tartibga solish” bahonasida ayovsiz kaltaklagani aniqlangan.
O‘rganishlar davomida gumonlanuvchi mart oyidan aprelgacha bolalarning ojiz holatidan foydalanib, ularni muntazam ravishda do‘pposlab kelgani ma’lum bo‘ldi. Mazkur holat yuzasidan Jinoyat kodeksining 110-moddasi 2-qismi (qiynash) bilan jinoyat ishi qo‘zg‘atilib, shaxs protsessual tartibda ushlangan.
Hozirda dastlabki tergov harakatlari olib borilmogda. Tergov yakuniga ko‘ra aybdorlarga nisbatan qonuniy qaror qabul qilinishi ma’lum qilindi.
