Biroq inson huquqlari tashkilotlari bu raqamlarni shubha ostiga olib, yuzlab siyosiy mahbuslar hanuz panjara ortida qolayotganini bildirmoqda.
Venesuela muvaqqat prezidenti Delsi Rodriges 23 yanvar kuni mamlakat qamoqxonalaridan 600 nafardan ortiq mahbus ozod etilganini e'lon qildi. Uning so'zlariga ko'ra, dekabrdan buyon jami 626 kishi erkinlikka chiqarilgan.
Shu bilan birga, Venesueladagi yetakchi huquqni muhofaza qilish tashkiloti – Foro Penal hozircha faqat 155 nafar siyosiy mahbus ozod qilinganini qayd etmoqda. Tashkilot hisob-kitoblariga ko'ra, hali ham 700 dan ortiq kishi qamoqda qolmoqda.
Ozod qilish jarayonining sustligi Karakasda mahbuslar yaqinlarining noroziligiga sabab bo'lmoqda. Ular hukumatdan barcha siyosiy mahbuslarni zudlik bilan qo'yib yuborishni talab qilmoqda.
Mahbuslarni ozod etish jarayoni AQSh ko'magida Nikolas Maduro hokimiyatdan chetlatilganidan so'ng boshlangan bo'lib, yangi hukumat bu borada xalqaro hamjamiyat oldida majburiyat olgan edi.
