Aybdor deb topilgan shaxslarga ma’muriy qamoq jazosi tayinlandi.
Toshkent viloyati Yangiyo‘l shahrida yashovchi fuqarolar tomonidan itni so‘yib iste’mol qilish holati yuzasidan sud qarori chiqarildi. Joriy yilning 12 yanvar kuni ish Yangiyo‘l tumani jinoyat sudida ko‘rib chiqilgan.
“Mehr va oqibat” hayvonlarni himoya qilish jamiyati ma’lum qilishicha, Ichki ishlar organlari tomonidan huquqbuzarlarning shaxsi aniqlangan. Ma’lum bo‘lishicha, voqeada Yangiyo‘l shahrida yashovchi to‘rt nafar fuqaro ishtirok etgan: ulardan biri itni ushlab turgan, ikkinchisi so‘ygan, uchinchisi esa uning terisini shilib olgan. To‘rtinchi fuqaro it go‘shtini bo‘laklarga ajratib, tayyorlangan kabobni boshqalar bilan birga iste’mol qilgan.
Sud qaroriga ko‘ra, uch nafar fuqaro O‘zbekiston Respublikasi Ma’muriy javobgarlik to‘g‘risidagi kodeksining 111-moddasi 2-qismi — hayvonlarga nisbatan shafqatsiz munosabatda bo‘lish bo‘yicha aybdor deb topilib, 10 sutkalik ma’muriy qamoq jazosiga hukm qilingan. To‘rtinchi shaxs esa jazoga tortilmagan.
