Toshkent shahrida erkakni kaltaklab, komaga tushirib qo‘ygan Akmal Shukurovni qamoqdan ozod etishga sabab bo‘lgan sudyalarga nisbatan jinoyat ishi qo‘zg‘atilib, ular qamoqqa olindi. Bu haqda O‘zbekiston Respublikasi Bosh prokuraturasi ma’lum qildi.
Qayd etilishicha, Toshkent shahar sudi raisi sobiq o‘rinbosari Murodjon Mirzajonov hamda jinoyat ishlari bo‘yicha shahar sudining sobiq sudyalari Odilbek Ilhomjonov, Mirziyod Obidov va Muhtarama Turg‘unovga adolatsiz sud qarorini chiqarish va sud ishlariga aralashish moddalari bilan ayblov e’lon qilingan.
Tergov materiallariga ko‘ra, ular apellyatsiya instansiyasida birinchi instansiya sudi hukmini noqonuniy ravishda o‘zgartirib, Akmal Shukurovni sud zalidan ozod qilgan. Keyinchalik protest asosida ushbu ajrim bekor qilinib, Shukurovga nisbatan 5 yil 3 oy ozodlikdan mahrum qilish jazosi tayinlangan.
Hozirda mazkur ish bo‘yicha dastlabki tergov harakatlari Bosh prokuratura tomonidan olib borilmoqda.
