O‘zbekistonda bolaning familiyasi sifatida otasining ismini qo‘llashga ruxsat berilishi mumkin. Buni nazarda tutuvchi qonun loyihasi Qonunchilik palatasi majlisida birinchi o‘qishda ma’qullandi.
Loyihaga ko‘ra, Oila kodeksining 69-moddasiga qo‘shimcha kiritilib, bolaning familiyasi ota-onasining familiyasiga ko‘ra yoki ota yoxud ona tomonidan bobosining ismi bilan bir qatorda, otasining ismi asosida ham belgilanishi mumkin bo‘ladi.
Adliya vaziri o‘rinbosari No‘mon Muhammadievning ta’kidlashicha, amaldagi tartibdagi cheklovlar qonun normalarining turli talqin qilinishiga va fuqarolarning e’tirozlariga sabab bo‘lmogda. Yangi qonun loyihasi esa milliy an’analarni inobatga olgan holda fuqarolar uchun qo‘shimcha qulayliklar yaratishga qaratilgan.
