Shavkat Mirziyoyev raisligida o‘tkazilgan yig‘ilishda Toshkent shahri iqtisodiyotini jadal rivojlantirish, investitsiya va eksport hajmini oshirish, shuningdek, yangi ish o‘rinlari yaratish masalalari muhokama qilindi. Qayd etilishicha, poytaxt hozirda mamlakat yalpi ichki mahsulotining 21 foizini ta’minlamoqda.
Joriy yil uchun shahar iqtisodiyotini 12 foizga oshirish, 3,6 mlrd dollarlik eksport va 9 mlrd dollar investitsiya jalb qilish kabi vazifalar belgilangan. Shu bilan birga, 12 ta tuman aniq sohalarga ixtisoslashtirilib, sanoat va xizmat ko‘rsatish tarmoqlarini rivojlantirishga alohida e’tibor qaratiladi.
Yig‘ilishda tadbirkorlar bilan o‘tkazilgan uchrashuvlar davomida mingdan ortiq muammolar aniqlandi va yangi takliflar ishlab chiqilgani qayd etildi. Ularni tezkor hal qilish uchun maxsus muvofiqlashtiruvchi kengash tuzish taklif qilindi.
Shuningdek, qo‘shimcha zaxiralarni ishga solish orqali 88 trln so‘mlik mahsulot ishlab chiqarish, 4,9 mlrd dollar eksportni ta’minlash va yangi ish o‘rinlari yaratish vazifalari qo‘yildi.
