Toshkent shahri Sergeli tumanida yo‘l-transport hodisasi sodir bo‘ldi. Bu haqda poytaxt IIBB Yo‘l harakati xavfsizligi boshqarmasi Axborot xizmati xabar qildi.
Ma’lum qilinishicha, joriy yilning 7 yanvar kuni soat 16:50 larda Qipchoq ko‘chasida BYD rusumli avtomashina haydovchisi svetoforning taqiqlovchi qizil chirog‘ida harakatlanib, ikkinchi darajali yo‘ldan orqaga qayrilayotgan Nexia-3 rusumli avtomashina bilan to‘qnashgan. Shundan so‘ng u to‘xtab turgan Cobalt rusumli avtomobilni ham urib ketgan.
Qayd etilishicha, BYD avtomashinasini boshqargan shaxsda haydovchilik guvohnomasi bo‘lmagan va u transport vositasini boshqarish ko‘nikmasiga ega emas. To‘qnashuvdan so‘ng u sarosimaga tushib, qisqa masofaga harakatlangan holda to‘xtagan. Haydovchi YTH joyini tark etmagan.
Yo‘l-transport hodisasi oqibatida tan jarohati olganlar yo‘q.
Hozirda usbu holat yuzasidan Toshkent shahar IIBB Yo‘l harakati xavfsizligi boshqarmasi tomonidan surishtiruv ishlari olib borilmoqda.
Ichki ishlar organlari barcha yo‘l harakati qatnashchilarini qoidalarga qat’iy rioya qilishga chaqirmoqda.
