Venesuelada AQSh tomonidan uyushtirilgan hujum oqibatida kamida 100 kishi halok bo‘ldi. Bu haqda mamlakat ichki ishlar vaziri Diosdado Kabello bayonotiga tayanib, Reuters xabar berdi.
Vazirning so‘zlariga ko‘ra, qurbonlarning aksariyati yoshlar bo‘lgan. U hujumni "xiyonatkorona" deb baholab, halok bo‘lganlar mazkur voqeaga aloqasi bo‘lmagan tinch aholi vakillari ekanini ta’kidlagan.
Shuningdek, Kabello prezident Nikolas Maduro qo‘lga olinishi vaqtida oyog‘idan, birinchi xonim Siliya Flores esa boshidan jarohat olganini ma’lum qilgan. CNN ham sud majlisi chog‘ida Floresning boshi bog‘langan, Maduroning esa harakatlanishda qiynalayotgani kuzatilganini xabar qilgan.
AQSh rasmiylari esa Karakasdagi amaliyot davomida taxminan 75 kishi halok bo‘lganini bildirgan. Ular orasida tinch aholi, Venesuela va Kuba xavfsizlik kuchlari vakillari bo‘lgani qayd etilgan. Shuningdek, bir necha nafar amerikalik harbiy jarohat olgan.
Venesuela rasmiylari AQShning "Mutlaq qat’iyat" nomli operatsiyasini harbiy tajovuz deb baholagan. Avvalroq mamlakatda usbu voqealar oqibatida halok bo‘lgan harbiylar xotirasi uchun bir haftalik motam e’lon qilingandi.
