Венесуэлада АҚШ томонидан уюштирилган ҳужум оқибатида камида 100 киши ҳалок бўлди. Бу ҳақда мамлакат ички ишлар вазири Диосдадо Кабелё баёнотига таяниб, Reuters хабар берди.
Вазирнинг сўзларига кўра, қурбонларнинг аксарияти ёшлар бўлган. У ҳужумни “хиёнаткорона” дея баҳолаб, ҳалок бўлганлар мазкур воқеага алоқаси бўлмаган тинч аҳоли вакиллари эканини таъкидлаган.
Шунингдек, Кабелё президент Николас Мадуро қўлга олиниши вақтида оёғидан, биринчи хоним Силия Флорес эса бошидан жароҳат олганини маълум қилган. CNN ҳам суд мажлиси чоғида Флореснинг боши боғланган, Мадуронинг эса ҳаракатланишда қийналаётгани кузатилганини хабар қилган.
АҚШ расмийлари эса Каракасдаги амалиёт давомида тахминан 75 киши ҳалок бўлганини билдирган. Улар орасида тинч аҳоли, Венесуэла ва Куба хавфсизлик кучлари вакиллари бўлгани қайд этилган. Шунингдек, бир неча нафар америкалик ҳарбий жароҳат олган.
Венесуэла расмийлари АҚШнинг “Мутлақ қатъият” номли операциясини ҳарбий тажовуз деб баҳолаган. Аввалроқ мамлакатда ушбу воқеалар оқибатида ҳалок бўлган ҳарбийлар хотираси учун бир ҳафталик мотам эълон қилинганди.
