2025 yil dekabr oyi boshida ijtimoiy tarmoqlarda Humans ilovasiga ulangan bank kartalaridan foydalanuvchilarning ruxsatisiz pul mablag‘lari yechib olingani haqida xabarlar tarqalgan edi. Markaziy bank Humans MChJ kompaniyasi bilan bog‘liq holat yuzasidan ma’lumot taqdim qildi.
Ma’lum qilinishicha, Humans kompaniyasiga to‘lov xizmatlarini taqdim etgan "Octagram" AJ to‘lov tashkilotida Markaziy bankning farmoyishi asosida ishchi guruh tuzilib, tekshiruv olib borilgan. Tekshiruv ma’lumotnomasi Toshkent shahar Ichki ishlar bosh boshqarmasiga huquqiy baho berish va chora ko‘rish uchun taqdim etilgan.
Humans vakillari pul mablag‘lari 4–8 dekabr kunlari firibgarlar tomonidan yechib olinganini ma’lum qilgan. Kompaniya aybsizligini ta’kidlab, muammo Paylov xizmatining texnik xatosi ortidan yuzaga kelganini bildirgan. Ammo Paylov firibgarlik operatsiyalari Humans tomonidan amalga oshirilganini iddao qilgan.
Eslatib o‘tamiz, 2025 yil 14 oktyabrda Toshkent tumanlararo iqtisodiy sudi Humans kompaniyasini bankrot deb topgan va uning faoliyatini to‘xtatmagan holda tugatish jarayonini boshlagan edi.
Fuqarolarning huquqlarini himoya qilish maqsadida Markaziy bank, Humans bilan bog‘liq holatda huquqni muhofaza qiluvchi organlarga murojaat qilishni so‘ramoqda.
