AQShning Braun universitetida yuz bergan ommaviy otishmada ikki kishi, jumladan, o‘zbekistonlik talaba Muhammadaziz Umurzоqov halok bo‘lgandi. Mazkur jinoyatni sodir etishda gumonlangan shaxs o‘lik holida topildi. Bu haqda AQSh prokurorining Bostondagi vakili Kristina Sterling ma’lum qildi.
Uning aytishicha, gumonlanuvchining jasadi Nyu-Xempshir shtatining Salem shahrida, Boston markazidan taxminan 30 kilometr shimolda joylashgan omborxonada aniqlandi. 18 dekabrgа o‘tar kecha usbu hududga Braun universitetidagi hodisa bo‘yicha tergov doirasida ko‘plab huquq-tartibot xodimlari jalb etilgan.
AQSh Adliya vazirligi vakillaridan biri anonim tarzda gumonlanuvchi o‘z joniga qasd qilganini bildirgan. Shu bilan birga, tergovchilar uning Braun universitetidagi otishmadan ikki kun o‘tib Massachusets texnologiya instituti (MIT) professori o‘ldirilgan jinoyatga ham aloqador bo‘lishi mumkinligini tekshirmoqda.
Eslatib o‘tamiz, Braun universitetidagi otishma 13 dekabr kuni Muhandislik va fizika fakulteti joylashgan Barus + Holley binosida sodir bo‘lgan. Qora kiyimdagi noma’lum shaxs imtihonlar vaqtida universitetga hujum qilib, ikki kishini otib o‘ldirgan, sakkiz kishini esa yaralagan. Gumonlanuvchi voqea joyidan piyoda qochib ketgan, qidiruv ishlari asosan yaqin hududlardagi xavfsizlik kameralariga tayangan holda olib borilgan.
Shuningdek, 47 yoshli MIT professori, yadro fizigi Nuno Lureyru Bruklayn shahridagi uyida otib o‘ldirilgani ma’lum. Avvalroq rasmiylar usbu ikki jinoyat o‘rtasida bog‘liqlik borligiga shubha bildirgan bo‘lsa-da, hozirda bu ehtimol yana tekshirilmоqda.
