АҚШнинг Браун университетида юз берган оммавий отишмада икки киши, жумладан, ўзбекистонлик талаба МуҳаммадАзиз Умурзоқов ҳалок бўлганди. Мазкур жиноятни содир этишда гумонланган шахс ўлик ҳолда топилди. Бу ҳақда АҚШ прокурорининг Бостондаги вакили Кристина Стерлинг маълум қилди.
Унинг айтишича, гумонланувчининг жасади Ню-Хемпшир штатининг Салем шаҳрида, Бостон марказидан тахминан 30 километр шимолда жойлашган омборхонада аниқланган. 18 декабрга ўтар кечаси ушбу ҳудудга Браун университетидаги ҳодиса бўйича тергов доирасида кўплаб ҳуқуқ-тартибот ходимлари жалб этилган.
АҚШ Адлия вазирлиги вакилларидан бири аноним тарзда гумонланувчи ўз жонига қасд қилганини билдирган. Шу билан бирга, терговчилар унинг Браун университетидаги отишмадан икки кун ўтиб Массачусетс технология институти (МИТ) профессори ўлдирилган жиноятга ҳам алоқадор бўлиши мумкинлигини текширмоқда.
Эслатиб ўтамиз, Браун университетидаги отишма 13 декабрь куни Муҳандислик ва физика факультети жойлашган Барус + Ҳоллей биносида содир бўлган. Қора кийимдаги номаълум шахс имтиҳонлар вақтида университетга ҳужум қилиб, икки кишини отиб ўлдирган, саккиз кишини эса яралаган. Гумонланувчи воқеа жойидан пиёда қочиб кетган, қидирув ишлари асосан яқин ҳудудлардаги хавфсизлик камераларига таянган ҳолда олиб борилган.
Шунингдек, 47 ёшли МИТ профессори, ядро физиги Нуно Лурейру Бруклайн шаҳридаги уйида отиб ўлдирилгани маълум. Аввалроқ расмийлар ушбу икки жиноят ўртасида боғлиқлик борлигига шубҳа билдирган бўлса-да, ҳозирда бу эҳтимол яна текширилмоқда.
