Oliy ta'lim vazirligi tomonidan “PROFI UNIVERSITY”ga yuridik yo‘nalish bo‘yicha berilgan litsenziya yuzasidan kelib chiqqan nizoga doir sud jarayoni bo‘yicha qaror e’lon qilindi.
Avvalroq Oliy ta'lim vazirligi 2025 yil 29 avgust kuni soat 06:19 dan 09:53 gacha license.gov.uz axborot tizimida yuzaga kelgan texnik nosozlik sababli, ko‘rib chiqish muddati tugamagan ayrim arizalar bo‘yicha nodavlat oliy ta'lim tashkilotlarining amaldagi litsenziyalariga o‘zgartirish kiritsh haqidagi so‘rovlar talab buzilgan holda tizim tomonidan ijobiy xulosa sifatida shakllantirilganini ma’lum qilgan edi. Vazirlik mazkur holatni texnik xato deb baholab, uning sabablarini o‘rganish davom etayotganini bildirgan.
Mazkur bayonotga javoban Adliya vazirligi tizimda hech qanday nosozlik kuzatilmaganini, u ko‘rsatilgan vaqt oralig‘ida ham to‘liq ishchi holatda bo‘lganini ma’lum qilgan.
Shundan so‘ng Oliy ta'lim, fan va innovatsiyalar vazirligi (arizachi sifatida) “PROFI UNIVERSITY” MChJga (javobgar) nodavlat ta’lim xizmatlarini ko‘rsatish uchun 2025 yil 29 avgustda berilgan 996228-sonli litsenziyani bekor qilish talabi bilan sudga murojaat qilgan.
Ammo 2025 yil 24 oktyabr kuni Toshkent tumanlararo iqtisodiy sudining qarori bilan vazirlikning da’vo talabi rad etilgan.
Universitet rahbari Bektosh Hatamov 10 dekabrdagi apellyatsiya sudi vazirlik foydasiga qaror qabul qilganini, ish endi taftish instantsiyasida ko‘rilishini ma’lum qildi.
