31 yoshli erkak nafas olishdagi muammolar sabab burun operatsiyasiga rozi bo‘lgan. Kerakli tibbiy tekshiruvlardan o‘tib, shifokorlar unga jarrohlik amaliyotiga ruxsat bergan. Biroq 12 noyabr kuni soat 11:30 da operatsiyaga kirgan bemor ko‘p o‘tmay vafot etgan, yaqinlariga esa bu haqida uch soat o‘tib xabar berilgan. Bu haqda “Millar” dasturi xabar berdi.
Marhumning otasi operatsiyadan so‘ng o‘g‘lining holatini ko‘rib shokka tushganini aytmoqda: “Operatsion kiyim yo‘q, qora futbolka va eski shimda yotibdi. Yordamchi apparatlar ko‘rinmadi, yuzlari ham artilmagan. Ikki nafar go‘dak yetim qoldi,” — deydi u.
Dastlabki ma’lumotlarga ko‘ra, bemor anafilaktik shokdan vafot etgan bo‘lishi mumkin. Yaqinlari esa unga narkoz me’yordan ortiq berilgani ehtimolini ilgari surmoqda.
Rasmiy manbalarda klinika nomi aytilmagan bo‘lsa-da, ijtimoiy tarmoqlarda bu operatsiya “Ibotov” klinikasida amalga oshirilgani haqida ma’lumotlar tarqalmogda. Marhumning oilasi klinika voqeadan keyin ham biron izoh bermaganidan norozi.
Hozirda Olmazor tumani prokuraturasi tomonidan tergov harakatlari olib borilmogda.
So‘nggi yillarda bunday holatlar ko‘paygani ham e’tibor qaratmoqda: – 2025 yil aprel — Farg‘onada 33 yoshli erkak; – 2025-yil iyun — Samarqandda 16 yoshli qiz; – 2025-yil avgust — Toshkentda 9 yoshli bola; – 2023 yil mart — blogger Farhod Mannopov burun operatsiyasidan so‘ng vafot etgan edi.
