Uchrashuvda Mirzayev ayollar sog‘lig‘ida kuzatilayotgan muammolar haqida gapirar ekan, saraton kasalliklari oshishining sabablaridan biri sifatida ularning tandirda non yopmay qo‘yganini tilga oldi.
“Mahallalarga borganda, aylanamiz — tandir yo‘q, non yopilmaydi. Ilgarigi qora bug‘doydan qo‘shib yopiladigan non boshqacha edi. Xo‘jayinlarni ham bulkaga o‘rgatib oldik. Samarqandda ishlaganimda koreyalik doktor kelib, ayollarda saraton nima uchun ko‘payganini o‘rgangan — birinchi o‘rinda kamharakatlik turibdi”, — dedi Mirzayev.
Uning so‘zlariga ko‘ra, tandirda non yopish jarayoni ayol organizmini qizitadi, qon aylanishini tezlashtiradi va bu “tomirlarni tozalashga yordam beradi”. Mirzayev bu holatni saraton xavfining kamayishi bilan bog‘lagandek chiqdi.
Shu bilan birga, mutaxassislar bunday da’volar ilmiy dalillarga tayanmasligini, rak kasalliklarining sabablari juda ko‘p omillar — genetika, muhit, ovqatlanish, yashash tarzi va kasbiy xavflar bilan bog‘liq ekanini ta’kidlashini eslash jo‘iz.
