Учрашувда Мирзаев аёллар соғлиғида кузатилаётган муаммолар ҳақида гапирар экан, саратон касалликлари ошишининг сабабларидан бири сифатида уларнинг тандирда нон ёпмай қўйганини тилга олди.
“Маҳаллаларга борганда, айланамиз — тандир йўқ, нон ёпилмайди. Илгариги қора буғдойдан қўшиб ёпиладиган нон бошқача эди. Хўжайинларни ҳам булкага ўргатиб олдик. Самарқандда ишлаганимда кореялик доктор келиб, аёлларда саратон нима учун кўпайганини ўрганган — биринчи ўринда камҳаракатликлик турибди”, — деди Мирзаев.
Унинг сўзларига кўра, тандирда нон ёпиш жараёни аёл организмини қизитади, қон айланишини тезлаштиради ва бу “томирларни тозалашга ёрдам беради”. Мирзаев бу ҳолатни саратон хавфининг камайиши билан боғлагандек чиқди.
Шу билан бирга, мутахассислар бундай даъволар илмий далилларга таянмаслигини, рак касалликларининг сабаблари жуда кўп омиллар — генетика, муҳит, овқатланиш, яшаш тарзи ва касбий хавфлар билан боғлиқ эканини таъкидлашини эслаш жоиз.
