Surxondaryo viloyati, Sariosiyo tuman hokimining sobiq o‘rinbosari A.Q.ning jinoyat ishi bo‘yicha hukm e’lon qilindi. Sud materiallariga ko‘ra, u tanishlari orqali bir fuqaroning bog‘chaga ishga kirish masalasini “hal qilib berish”ni aytib, vositachi yordamida 500 dollar olgan. Pulni esa xizmat mavqeidan foydalanib, firibgarlik yo‘li bilan o‘zlashtirgani qayd etilgan.
Sud jarayonida A.Q. ayblovni rad etib, mablag‘ni qarz sifatida olganini bildirgan. Ammo sud guvohlarning o‘zgarib qolgan ko‘rsatmalarini ishonchsiz deb topdi va tergov ma’lumotlaridagi dalillarni asos qilib oldi.
Natijada A.Q. JKning firibgarlik va pora berishga dalolat qilish bilan bog‘liq moddalarida aybli deb topilib, 2 yil 1 oy mansabdorlik lavozimlarida ishlash huquqidan mahrum etilgan holda 3 yil 1 oy muddatga qamoq jazosiga hukm qilindi. Ishga aloqador 500 dollar esa davlat daromadiga o‘tkaziladi.
