Sirdaryoda erkak bemor xotinini rashk qilib shifokorni kaltaklagani haqida video tarqaldi. Holat yuzasidan viloyat IIB rasmiy ma’lumot berdi.
Ma’lum qilinishicha, “102” orqali kelib tushgan chaqiruvda shifoxonaga ko‘rikka olib kelingan bemorning yaqinlari o‘rtasida janjal kelib chiqqan.
Vaqea joyiga etib borgan profilaktika inspektorlari holatni o‘rganish jarayonida bemor ayolning turmush o‘rtog‘i va o‘g‘li shifokor ko‘rigiga olib kelgani, ko‘rik vaqtida navbatchi shifokor bemorni o‘tirishga yordamlaship, qorin sohasini tekshirayotgan payt rashk tufayli eri shifokor bilan janjallashib ketganini aniqlandi.
O‘tkazilgan tergovga qadar tekshiruv doirasida shifokor sud-tibbiy ekspertizadan o‘tkazildi. Ekspertiza xulosasiga ko‘ra, shifokorda tan jarohati yoki shikast izlari aniqlanmadi.
To‘plangan materiallar Jinoyat ishlari bo‘yicha Mirzaobod tuman sudida ko‘rib chiqildi. Sud qaroriga ko‘ra, erkak Ma’muriy javobgarlik to‘g‘risidagi Kodeksning 183-moddasi (mayda bezorilik) hamda 197 prim 7-moddasi (tibbiyot xodimining qonuniy faoliyatiga to‘sqinlik qilish) talablarini buzgan deb topildi va unga 15 sutka ma’muriy qamoq jazosi tayinlandi.
