Kenyaning g‘arbidagi Kisumu viloyatida 8 avgust kuni kechqurun sodir bo‘lgan yo‘l-transport hodisasi oqibatida kamida 25 kishi vafot etdi.
Nyanza viloyati yo‘l harakati xavfsizligi boshqarmasi boshlig‘i Peter Maynaning ma’lum qilishicha, qurbonlar dafn marosimiga borayotgan maktab avtobusidagi yo‘lovchilar bo‘lgan. Transport vositasi Kisumu aylanma yo‘lida halokatga uchragan va ag‘darilgan.
Maynaning aytishicha, AIC Naki High School maktabiga tegishli avtobus mahalliy vaqt bilan soat 17:00 atrofida Kakamegadan Kisumu tomon ketayotganda falokat yuz bergan.
Ta’kidlanishicha, haydovchi aylanma yo‘lga yaqinlashganda yuqori tezlikda transport vositasini boshqara olmay qolib, qarama-qarshi yo‘nalishga chiqib ketgan va ariqqa quilib tushgan.
“Halok bo‘lganlar orasida 10 nafar ayol, 10 nafar erkak va bir nafar sakkiz oylik qizaloq bor. Avariya sabablari hozirda o‘rganilmoqda”, dedi Peter Mayna voqea joyida jurnalistlarga.
Shuningdek, u besh kishi og‘ir tan jarohati olib, davolanayotganini, yana 15 kishi, jumladan bir bola yengil jarohatlanganini qo‘shimcha qilgan.
Kenya va butun Sharqiy Afrika mintaqasida yo‘l-transport hodisalari tez-tez uchraydi. Bu hududlarda yo‘llar asosan tor, yo‘l qoplama yomon ahvolda va ko‘plab chuqurlarga ega.
Huquq-tartibot idoralari xodimlari ko‘pincha haydovchilarni tezlik oshirishda ayblashadi.
