Davlat xavfsizlik xizmati tomonidan ichki ishlar va bojxona idoralari bilan hamkorlikda o‘tkazilgan tezkor tadbirlar natijasida mamlakat bo‘ylab 22 kg 585 grammdan ortiq giyohvandlik vositalarining noqonuniy aylanmasiga chek qo‘yildi.
Surxondaryo viloyati, Denov tumani 1987 yilda tug‘ilgan, ilgari sudlangan erkak yo‘lovchi sifatida ketayotgan “Cobalt” mashinasida 9 kg “gashish” moddasi bilan qo‘lga tushdi. Ma’lum bo‘lishicha, ushbu modda Tojikistondan keltirilgan va sotish uchun mo‘ljallangan.
Farg‘ona viloyati. 1994 va 1988 yilda tug‘ilgan ikki fuqaro mashinada 5,8 kg “gashish” olib ketayotganida ushlangan. Ular ushbu moddani har kg uchun 89 mln so‘mdan sotishga uringanida, ularni kutib olmoqchi bo‘lgan 1997 yilda tug‘ilgan boshqa shaxs ham qo‘lga olindi. Jinoyat ortida turgan yetakchi — So‘x tumanida yashovchi 1987 yilda tug‘ilgan shaxs ham ushlangan.
Namangan shahri. Avval sudlangan 1992 yilda tug‘ilgan fuqaro 3,95 kg “gashish”ni 38 ming AQSH dollariga sotayotgan paytda, jinoiy sherigi bilan birga ushlandi. Uning uyidan yana 868 gramm giyohvand modda topildi.
Surxondaryo viloyati, Oltinsoy tumani 1969 va 1986 yilda tug‘ilgan ikki erkak Tojikistondan olib kelingan 1,96 kg “opiy” moddasini 200 mln so‘mga sotayotgan paytda qo‘lga olindi.
Sirdaryo viloyati. Farg‘ona va Andijon viloyatlarida yashovchi, ilgari sudlangan ikki fuqaro Tojikistondan olib kelingan 943 gramm “opiy” moddasini sotishga uringanlarida, tegishli organlar tomonidan ushlandi.
Tezkor tadbirlar davomida jamlamada 22 kg dan ziyod giyohvand moddalarning noqonuniy savdosiga barham berildi.
Hozirda barcha gumondorlarga nisbatan jinoyat ishlari qo‘zg‘atilgan va ehtiyot chorasi sifatida qamoqqa olingan. Tergov ishlari davom etmoqda.
