Qashqadaryo viloyati Qamashi tumanidagi xususiy bog‘chada 2 yoshli qizcha nazoratsiz qolgani sabab ariqqa tushib ketib, vafot etdi.
Ushbu voqea viloyatning Qamashi tumanidagi xususiy bog‘chada 20 may kuni sodir bo‘lgan. Marhumaning onasi bog‘cha ochilgan vaqtda ariq borligi sababli xavfli ekanini ota-onalar aytgani, lekin bog‘cha ma’muriyati xavfsizlik chorasi ko‘rilishini aytganini ta’kidlagan.
"20 may kuni qizimni har doimgidek bog‘chaga kuzatdim. Qaynog‘am kelib qizingni mazasi bo‘lmabdi, deb meni olib bordi. Borsam qizimning joni uzilgandi, yerda yotgan edi. Badanlari muzdek. Daraxt tagida bolamni o‘rab qo‘yishgan ekan.
Man ishonib ularga bolamni topshirdim, nega unday e’tiborsizlik qilishadi. 3 kun bo‘ldi bog‘cha yana ishlayapti. Ular qat’iyan javobgarlikka tortilishini so‘rayman", - deydi qizchaning onasi.
Bog‘cha xodimasi bergan ko‘rsatmasida bolalarning yarmi uxlatish uchun xonaga olib kirilgani, qolgani esa hovlida qolgani aytilgan. Ulardan biri bo‘lgan marhuma qizaloq nazoratsiz qolgani sababli ko‘chaga chiqib, bog‘cha atrofidagi ariqqa tushib ketib, halok bo‘lgan.
