Qashqadaryo viloyatidagi mahalla raisining paxta terimiga chiqmaganlarga bola puli berilmasligi bo‘yicha tarqalgan ovozli xabari yuzasidan Davlat mehnat inspeksiyasi o‘rganish o‘tkazdi. Bu haqda Bandlik vazirligi matbuot xizmati xabar bermoqda.
O‘rganish davomida 2024 yil 9 oktyabr kuni Shahrisabz tumanidagi "Paxtakor" MFY raisi L.O‘roqov Nushkent qishlog‘ining "Nushkent birlashaylik" Telegram kanaliga ovozli xabar yuborib ishsiz fuqarolarni paxta yig‘im-terimiga chaqirgani, shundan so‘ng ular terimga kelgani ma’lum bo‘ldi.
"Kimda-kim nafaqa puli olayotgan bo‘lsa, hech bo‘lmasa otini yozdirib, paxta terimida kg qildirmasa bo‘lmaydi, bola nafaqasi uzilib qolishi mumkin. Ertaga yana xafagarchilik bo‘lib, gina qilib yurmanglar. Hamma to‘g‘ri tushungan holatda paxtaga chiqsin. Hozir biz shuning ro‘yxatini shakllantiryapmiz. Olim akani yeriga kelyapman men. Nechta odam chiqyapti nechta odam bola puli oladi, shakllantiraman. Chiqmayotganlar xafa bo‘lmanglar. Oldingizdan o‘tib, ogohlantirish beryapmiz", — degan u.
Holat yuzasidan mahalla raisiga Ma’muriy javobgarlik to‘g‘risidagi kodeksning 51-moddasi (Mehnatga ma’muriy tarzda majburlash) 1-qismiga asosan bazaviy hisoblash miqdorining 50 baravari (18 750 000 so‘m) miqdorida jarima qo‘llanildi.
Bandlik vazirligi fuqarolarni majburiy mehnatga jalb qilish holatlariga duch kelinsa, Bandlikka ko‘maklashish bo‘limlari yoki 1282 — qisqa raqami hamda @munosibmehnat_bot telegram boti orqali Davlat mehnat inspeksiyasiga murojaat qilishga chaqirdi.
