АҚШда Венесуэла президенти Николас Мадуронинг қўлга олиниши билан боғлиқ операцияда иштирок этган ҳарбий Ганнон Кен Ван Дейк ҳибсга олинди. У махфий маълумотлардан фойдаланиб, гаров тикиш орқали 400 минг доллардан ортиқ маблағ ишлаганликда айбланмоқда.
Тергов маълумотларига кўра, Ван Дейк "Polymarket" платформасида Мадуронинг лавозимидан четлатилиши ва қўлга олиниши билан боғлиқ башоратларга 33 минг доллардан ортиқ пул тиккан. Натижада у 409 минг доллардан зиёд даромад олган.
Федерал органлар уни махфий маълумотлардан ноқонуний фойдаланиш, фирибгарлик ва ҳукумат маълумотларини ўғирлашда айбламоқда. Шунингдек, у даромадни яшириш мақсадида аккаунт ва электрон манзилларини ўзгартиришга урингани қайд этилган.
АҚШ президенти Дональд Трамп мазкур ҳолатга муносабат билдириб, “бутун дунё маълум маънода казинога айланиб қолди”, дея изоҳ берган.
Маълумотларга кўра, Мадуро АҚШ кучлари томонидан Каракасда қўлга олинган ва кейинчалик Нью-Йоркка олиб кетилган. Унга нисбатан наркотерроризм ва бошқа оғир жиноятлар бўйича айбловлар илгари сурилган.
