АҚШ президенти Дональд Трамп НАТОни Эрон билан боғлиқ можарода Вашингтонни қўллаб-қувватламаганликда айблади. Бу ҳақда у Оқ уйда НАТО бош котиби Марк Рютте билан бўлиб ўтган шахсий учрашувдан сўнг маълум қилди.
Трамп Truth Social тармоғидаги саҳифасида шундай ёзди: “НАТО бизга керак бўлган пайтда у ерда эмас эди ва агар яна керак бўлса, улар ҳам бўлмайди”.
Шу билан бирга, Марк Рютте CNN телеканалига берган интервьюсида Трамп билан учрашувни “жуда очиқ” деб таърифлади. Унинг сўзларига кўра, мулоқот давомида айрим келишмовчиликлар ҳам кузатилган.
Маълум қилинишича, чоршанба куни бўлиб ўтадиган музокаралар олдидан Трамп трансатлантик ҳарбий иттифоқдан чиқиш ғоясини ҳам кўриб чиққан. Бунга айрим НАТО давлатларининг Ҳормуз бўғозини қайта очиш ташаббусини қўллаб-қувватламагани сабаб бўлган. Ушбу масала глобал нефть нархларига таъсир кўрсатиши мумкин.
Сўнгги ҳафталарда Трамп 32 аъзодан иборат НАТО иттифоқидан чиқиш эҳтимолини бир неча бор тилга олган.
