Маълум қилинишича, воқеа бозор ҳудудида хизмат олиб бораётган ЙПХ инспектори томонидан светофорнинг тақиқловчи қизил чироғида ҳаракатланган Nexia-1 автомобилини тўхтатиш билан бошланган. Инспектор ҳайдовчига қоидабузарликни тушунтирганда у бунни инкор этиб, мазкур жойда светофор мавжуд эмаслигини билдирган.
Ҳайдовчидан ҳужжатлар сўралганда у автомашинага ўтириб, ички ишлар ходимининг қонуний талабига бўйсунмаган ҳолда бақир-чағир қилган ва транспорт воситасини ходим томонга ҳайдаб, воқеа жойидан қочиб кетган. Кўрилган чоралар натижасида ҳайдовчи Қоратепа қишлоғида тўхтатилган.
Сўроқ жараёнида у агрессив ҳолатда бўлганини, жаримадан қочиш мақсадида воқеа жойидан кетиб қолганини билдирган. Суд мажлисида эса ўз айбига иқрор бўлиб, ўша куни отасининг автомашинасида шифохонага боргани, қайтишда ЙПХ ходими томонидан тўхтатилгани ва унинг қонуний талабига бўйсунмай кетиб қолганини маълум қилган ҳамда суддан енгиллик сўраган.
Суд тўпланган далиллар ва томонларнинг фикрларини инобатга олиб, ҳайдовчини Маъмурий жавобгарлик тўғрисидаги кодекснинг 183-моддаси билан айбли деб топди ва унга 7 сутка маъмурий қамоқ жазоси тайинлади.
Шунингдек, 194-модданинг 1-қисмига асосан базавий ҳисоблаш миқдорининг беш баравари — 2 миллион 60 минг сўм миқдорида жарима белгиланди. 34-модда тартибида якуний жазо сифатида 7 сутка маъмурий қамоқ қўлланди.
