Адлия вазирлиги сунъий интеллектга асосланган ечимларни яратиш, жорий этиш ва улардан фойдаланиш тартибини белгилайдиган этика қоидаларини давлат рўйхатидан ўтказди. Ҳужжат 2026 йил 17 июндан кучга киради.
Маълум қилинишича, янги қоидаларга кўра, сунъий интеллект технологияларини ишлаб чиқувчилар ва улардан фойдаланувчилар бир қатор асосий тамойилларга амал қилиши шарт. Улар орасида қонунийлик, шахс, жамият ва давлат манфаатларини ҳамда атроф-муҳитни ҳимоя қилиш устуворлиги, тушунарлилик, масъулият ва назорат каби талаблар бор.
Шунингдек, сунъий интеллектдан фойдаланишда адолатлиликни таъминлаш, камситишга йўл қўймаслик, очиқлик ва шаффофликни сақлаш, маълумотларни ҳимоя қилиш ҳамда технологияларнинг ишончли ва хавфсиз бўлиши ҳам асосий тамойиллар сифатида белгиланган.
Қайд этилишича, мазкур этика қоидалари сунъий интеллектдан фойдаланишда инсон ҳуқуқлари ва жамият манфаатларини ҳимоя қилишга хизмат қилади.
