Adliya vazirligi sun'iy intellektga asoslangan yechimlarni yaratish, joriy etish va ulardan foydalanish tartibini belgilaydigan etika qoidalarini davlat ro‘yxatidan o‘tkazdi. Hujjat 2026 yil 17 iyundan kuchga kiradi.
Ma’lum qilinishicha, yangi qoidalarga ko‘ra, sun'iy intellekt texnologiyalarini ishlab chiquvchilar va ulardan foydalanuvchilar bir qator asosiy tamoyillarga amal qilishi shart. Ular orasida qonuniylik, shaxs, jamiyat va davlat manfaatlarini hamda atrof-muhitni himoya qilish ustuvorligi, tushunarlik, mas’uliyat va nazorat kabi talablar bor.
Shuningdek, sun'iy intellektdan foydalanishda adolatlilikni ta’minlash, kamsitishga yo‘l qo‘ymaslik, ochiqlik va shaffoflikni saqlash, ma’lumotlarni himoya qilish hamda texnologiyalarning ishonchli va xavfsiz bo‘lishi ham asosiy tamoyillar sifatida belgilangan.
Qayd etilishicha, mazkur etika qoidalari sun'iy intellektdan foydalanishda inson huquqlari va jamiyat manfaatlarini himoya qilishga xizmat qiladi.
