2026 йил март ойида Тошкент учун янги дизайн-код тасдиқланди. Ҳужжат уч ойдан кейин кучга кириши белгиланган бўлса-да, реклама баннерларини демонтаж қилиш бўйича рейдлар 2025-йил апрелидан бошлаб бошланган.
Тошкент шаҳар ҳокимлиги изоҳига кўра, эски реклама конструкциялари янгисига алмаштирилиши керак. Бунинг учун тадбиркорлар “реклама жойи паспорти”ни расмийлаштириши лозим. Унинг қиймати ойига 1 квадрат метр учун базавий ҳисоблаш миқдорининг 7 фоизини ташкил этади ҳамда ер коэффициентига қараб х1 дан х3 гача ҳисобланади.
Маҳаллий бренд асосчиларидан бири Uz.news’га берган интервьюсида демонтаж ишлари ёздан ноябргача турли кўчаларда босқичма-босқич ўтказилганини айтди. Унинг сўзларига кўра, Шота Руставели кўчасида баннер огоҳлантиришсиз бузиб ташланган, Самарқанд дарвоза ҳудудида эса икки соат ичида олиб ташлаш талаб қилинган. Тадбиркор реклама баннери йўқлиги сабаб мижозлар камайганини, натижада икки филиал ёпилганини айтади. Унинг ҳисобича, баннер ва фасад таъмири учун қарийб 6 миллион сўм ва 300 доллар зарар кўрилган.
Блоомора гул дўкони эгаси Линар Газимов эса 4-март куни — мавсумнинг энг гавжум пайтида баннерини ечишга мажбур бўлганини билдирган. Уларнинг айтишича, ишчилар зарар етказмаслиги учун конструкцияни ўзлари демонтаж қилган. Маҳалла ёки профилактика инспекторидан аниқ кўрсатма олишнинг имкони бўлмаган. Натижада 8-март арафасида баннер бўлмагани сабаб тасодифий харидорлар камайган. Янги баннер эса стандартларга мувофиқ тахминан 6 миллион сўмга тушиши айтилмоқда.
Яна бир тадбиркор 20-январь куни баннери огоҳлантиришсиз олиб ташланганини маълум қилган. Унинг айтишича, ҳокимлик ва Миллий гвардия ходимлари реклама конструкциясини бузишни бошлаган. Тадбиркор конструкцияни сақлаб қолиш учун демонтажни ўзи ташкил қилиб, 200 доллар тўлаган. Баннернинг ўзи эса 2300 долларга тушган. Ҳозирда дўконни харидорлар топиши қийинлашгани айтилмоқда.
Тошкент шаҳар ҳокимлигида эса тадбиркорлар бу ўзгаришлар ҳақида аввалдан ОАВ ва ишчи гуруҳлар орқали огоҳлантирилганини билдирди. Маъмуриятга кўра, улар тадбиркорлар билан мулоқотга очиқ ва мол-мулкка зарар етказилгани бўйича расмий шикоятлар келиб тушмаган.
Аввалроқ собиқ депутат Расул Кушербаев ҳам бу жараёнларни танқид қилиб, дўконлар ва реклама конструксияларлини бузиш бизнесга босим сифатида баҳоланиши мумкинлигини айтганди. У ҳокимиятни барча ишларни қонун доирасида олиб боришга чақирган.
