Москва вилоятидаги Crocus City Hall’да терактни ижро этишда айбланган Тожикистоннинг тўрт нафар фуқароси умрбодга қамалди. Бу ҳақда суд ҳукмига таяниб, “РИА Новости” хабар берди.
Далержон Мирзоев, Саидакрами Рачабализода, Шамсидин Фаридуни ва Муҳаммадсобир Файзов суд томонидан террорчилик фаолиятини амалга ошириш мақсадида тайёргарликдан ўтиш, қурол-яроғнинг ноқонуний муомаласи, террорчи ташкилот фаолиятида иштирок этиш ва террорчилик ҳужумини содир этишда айбдор деб топилди.
Улар жазонинг бир қисмини қамоқда, бир қисмини эса махсус тартибли колонияда ўташи керак бўлади. Бундан ташқари, суд уларнинг ҳар бирига 990 000 рубль миқдорида жарима тайинлади. Суд терговнинг тўрт киши ҳам “Ислом давлати Хуросон вилояти” гуруҳи аъзолари бўлган деган хулосасига қўшилган.
Иш бўйича яна 11 киши умрбод қамоқ жазосига, айбланувчиларга автомобиль ва квартира берган Исроил, Диловар ва Аминчон Исломовлар 19 йил-у 11 ойга, ижрочиларга оқ Reno Logan сотган Алишер Қосимов эса 22 йил-у 10 ойга қамалди.
Crocus City Hall’даги теракт 2024 йил 22 март куни кечқурун содир бўлди. Бир неча қуролланган киши концерт зали биносига бостириб кириб, оломонни отиб ташлаган, кейин эса бинони ёқиб юборган. Теракт оқибатида 149 киши ҳалок бўлди, бир киши бедарак йўқолди, 609 киши тан жароҳати олди.
Ҳужумни содир этишда Тожикистоннинг тўрт нафар фуқароси айбланган, улар айбига иқрор бўлган. Мазкур ҳолатдан кейин Россияда мигрантларга нисбатан рейдлар кучайганди.
