Сурхондарё вилояти Экология, атроф-муҳитни муҳофаза қилиш ва иқлим ўзгариши бошқармасининг туманлардан биридаги бўлими бошлиғи маҳаллий МЧЖ ҳудудида дарахтларни ноқонуний кесиш ҳолати бўйича расмийлаштирилган далолатномани ўзгартириб бериш эвазига 500 АҚШ доллари миқдорида пора талаб қилган.
Маълум қилинишича, у табиатга етказилган зарарни камайтириб кўрсатиш мақсадида далолатномани таҳрирлаб беришни ваъда қилган. Давлат хавфсизлик хизмати, Бош прокуратура ҳузуридаги Департамент ҳамда ички ишлар органлари ходимлари ҳамкорлигида ўтказилган тезкор тадбирда мансабдор шахс пул маблағини тамагирлик йўли билан олган вақтда ашёвий далиллар билан ушланган.
Ҳозирда унга нисбатан Жиноят кодексининг 210-моддаси 2-қисми “в” банди билан жиноят иши қўзғатилиб, “қамоқ” эҳтиёт чораси қўлланилган. Тергов ҳаракатлари олиб борилмоқда.
