Россиянинг турли ҳудудларида қаровсиз қолиб кетган яна 6 нафар бола Ўзбекистонга қайтарилди. Бу ҳақда Болалар омбудсмани хабар берди.
Маълум қилинишича, бола ҳуқуқлари бўйича вакил ўзининг хорижий ҳамкасби — Россия Федерацияси Болалар омбудсманига сўров юборган. Унда қаровсиз қолган вояга етмаган болалар Ўзбекистон масъул идоралари (ИИВ, ТИВ) томонидан болалар ватанга қайтарилгунга қадар, уларни Россияда яшаб турган ҳудудларидаги болалар муассасаларида вақтинча жойлаштирилишида амалий ёрдам сўралган.
Бунга жавобан Россия Болалар омбудмани томонидан зарур кўмак кўрсатилиб, болалар жойлашган ҳудудларда улар учун қулай ва муносиб шарт-шароит таъминланган.
2026 йил 1 февраль куни 6 нафар бола (2 нафари Санкт Петербургдан, 1 нафари Москвадан, 1 нафари Москва вилоятидан, 1 нафари Татаристоннинг Қозон шаҳридан, 1 нафари Кабардин-Балкар республикасидан) ИИВ вакиллари томонидан Ўзбекистонга қайтарилган.
