Кеча, 30 январь куни Жанубий Кореядаги маиший буюмлар ишлаб чиқарувчи заводда содир бўлган ёнғин ортидан Ўзбекистон фуқароси бедарак йўқолди. Бу ҳақда маҳаллий “Yonhap News” агентлиги хабар берди.
Маълум қилинишича, маҳаллий вақт билан 14:56 да Жанубий Кореянинг Чунгбук провинцияси, Маэнгдонг қишлоғидаги заводда ёнғин чиққан. Ўт тез суръат билан тарқалган ва ён-атрофдаги бошқа корхоналарга ҳам таъсир кўрсатган. Ушбу заводда асосан нам салфеткалар ва болалар тагликлари ишлаб чиқарилган, расмий маълумотларга кўра заҳарли кимёвий моддалар ёки хавфли юклар мавжуд эмас эди.
Ёнғин вақтида заводда ишлаётган 83 нафар ходимдан 81 нафари ўз вақтида эвакуация қилинган. Аммо 20 ёш атрофидаги Непал фуқароси ва 50 ёш атрофидаги Ўзбекистон фуқароси билан алоқа узилган, улар бедарак йўқолган деб ҳисобланмоқда.
Ёнғинни ўчириш учун фавқулодда вазиятлар хизмати “2-даражали жавоб режими”ни эълон қилган. Ҳодисага 105 нафар қутқарувчи, 56 та махсус техника ва 4 та вертолёт жалб қилинган. Шамол таъсирида учган ёнғин чоғлари тахминан 500 метр узоқликдаги яқин тоғ ёнбағридаги ўрмонга ҳам тарқалган, аммо соат 16:10 га келиб ёнғин тўлиқ ўчирилган.
Ҳозирда расмийлар ёнғин сабабини ва келтирилган моддий зарар миқдорини аниқлаш учун текширув ўтказмоқда.
