БМТ Бош котиби Антониу Гутерриш Эронда давом этаётган оммавий норозиликлар чоғида хавфсизлик кучлари томонидан куч қўлланилгани, оқибатда юзлаб одамлар ҳалок бўлгани ҳақидаги хабарлардан ҳайратда қолганини маълум қилди. Унинг баёноти 11 январь куни БМТ расмий сайтида эълон қилинди.
Гутерришга кўра, барча эронликлар ўз норозилик ва шикоятларини тинч йўл билан, қўрқмасдан ифода этиш ҳуқуқига эга. “Халқаро ҳуқуқда мустаҳкамланган сўз эркинлиги, бирлашиш ва тинч намойишлар ҳуқуқлари тўлиқ ҳурмат қилиниши ва ҳимоя қилиниши керак”, дейди БМТ раҳбари.
У Эрон расмийларини максимал даражада вазмин бўлишга, “кераксиз ёки номутаносиб” куч ишлатишдан тийилишга чақирган. Шунингдек, Теҳронни ахборотга киришни таъминлашга, жумладан, алоқа ва интернетни тиклаш чораларини кўришга даъват этган.
Европа Парламенти президенти Роберта Метсола ҳам Эрондаги намойишчиларни қўллаб-қувватлашини билдирган. У ижтимоий тармоқларда “кўчаларга чиққан жасур қизлар, талабалар, эркаклар ва аёллар”га мурожаат қилиб, “халқидан қўрқадиган ҳар қандай режим мулоқотни тўсади”, деб таъкидлаган.
Маълумот ўрнида, Эрон раҳбариятига қарши оммавий норозилик намойишлари 2025 йил 28 декабрдан бери давом этмоқда. Қаттиқ хавфсизлик чоралари ва интернет чекловларига қарамай, намойишчилар Теҳрон ва бошқа йирик шаҳарлар кўчаларига чиқишда давом этмоқда.
