BMT Bosh kotibi Antoniu Guterresh Eronda davom etayotgan omaviy noroziliklar chog‘ida xavfsizlik kuchlari tomonidan kuch qo‘llanilgani, oqibatda yuzlab odamlar halok bo‘lgani haqidagi xabarlardan hayratda qolganini ma’lum qildi. Unga bayonati 11 yanvar kuni BMT rasmiy saytida e’lon qilindi.
Guterreshga ko‘ra, barcha eronliklar o‘z norozilik va shikoyatlarini tinch yo‘l bilan, qo‘rqmasdan ifoda etish huquqiga ega. "Xalqaro huquqda mustahkamlangan so‘z erkinligi, birlashish va tinch namoyishlar huquqlari to‘liq hurmat qilinishi va himoya qilinishi kerak", deydi BMT rahbari.
U Eron rasmiylarini maksimal darajada vazmin bo‘lishga, "keraksiz yoki nomutanosib" kuch ishlatishdan tiyilishga chaqirgan. Shu bilan birga, Tehronni axborotga kirishni ta’minlashga, jumladan, aloqa va internetni tiklash choralarini ko‘rishga da’vat etgan.
Yevropa Parlamenti prezidenti Roberta Metsola ham Erondagi namoyishchilarni qo‘llab-quvvatlashini bildirgan. U ijtimoiy tarmoqlarda "ko‘chalarga chiqqan jasur qizlar, talabalar, erkaklar va ayollar"ga murojaat qilib, "xalqidan qo‘rqadigan har qanday rejim mulogotni to‘sadi", deb ta’kidlagan.
Ma’lumot o‘rnida, Eron rahbariyatiga qarshi omaviy norozilik namoyishlari 2025 yil 28 dekabrdan beri davom etmoqda. Qattiq xavfsizlik choralari va internet cheklovlariga qaramay, namoyishchilar Tehron va boshqa yirik shaharlar ko‘chalariga chiqishda davom etmoqda.
