Блогернинг айтишича, 1956 йилда туғилган, ИИ-гуруҳ ногирони бўлган отаси 10 апрель куни сирли тарзда йўқолган. Бир суткалик қидирувлардан сўнг у Самарқанд туманидаги руҳий хасталар шифохонасида экани аниқланган. Оила аъзоларининг таъкидлашича, бемор у ерга Ички ишлар органлари ходимлари томонидан олиб борилган ва бу ҳақда яқинларига хабар берилмаган.
Темур Малик шифохонада отасига кучли таъсир қилувчи дори воситалари қўлланганини иддао қилиб, у уйга қайтарилгач бир сутка давомида ҳушига келмай ётгани ва 14 апрель куни вафот этганини билдирган. Марҳум сўнгги йилларда алсгеймер касаллиги билан оғриб келган.
Ҳозирда ҳолат юзасидан вилоят прокуратурасига ариза киритилган бўлиб, суд-тиббиёт экспертизаси тайинланган. Бош прокуратура матбуот хизмати ҳам мазкур воқеа бўйича терговга қадар текширув ҳаракатлари олиб борилаётганини маълум қилиб, якунда қонуний қарор қабул қилинишини билдирган.






