Ўзбекистон ва Парагвай Президентлари ўртасидаги олий даражадаги музокаралар якунлангач, 11 декабрь куни Кўксарой қароргоҳида дарахт экиш маросими бўлиб ўтди.
Президент матбуот хизмати маълумотига кўра, Шавкат Мирзиёев ва Сантьяго Пенья Фахрий меҳмонлар хиёбонида ўзаро дўстлик ва узоқ муддатли ҳамкорликка садоқат рамзи сифатида биргаликда ниҳол қадади.
Парагвай Республикаси Президенти Сантьяго Пенья расмий ташриф билан 11 декабрь куни Ўзбекистонга келди. У “Тошкент-Ҳумо” халқаро аэропортида ҳукумат вакиллари томонидан кутиб олинди. Кўксаройдаги расмий кутиб олиш маросимидан сўнг Президентлар тор ва кенг таркибда музокаралар ўтказиб, Қўшма баёнотни имзоладилар.
Сантьяго Пеньянинг ташрифи 11–13 декабрь кунларига мўлжалланган бўлиб, унга рафиқаси Летиция Окампос ҳамроҳлик қилмоқда. Парагвай етакчиси сафар давомида Халқаро автомобиль федерацияси Бош ассамблеясида ва федерация томонидан ўтказиладиган мусобақалар ғолибларини тақдирлаш маросимида ҳам иштирок этиши белгиланган.
